भक्त आणि अनुयायी

थोर पुरुषांचे भक्त होणे ही सोपी गोष्ट आहे.  अनुयायी होणे ही कठीण गोष्ट आहे त्यामुळे थोर पुरुषाला भक्त भरपूर असतात परंतु अनुयायी फारच थोडे असतात!
     भक्त हे थोर पुरुषाची प्रतिमा किंवा मूर्ती तयार करून  तिची पूजा करतात तर अनुयायी त्यांच्या विचाराप्रमाणे जीवन जगण्याचा प्रयत्न करतात.
      भक्त त्या थोर पुरुषाला देव बनवून त्याच्याकडे स्वत:साठी दया याचना करतात,तर अनुयायी त्या थोर पुरुषाचे विचार समाजासाठी कसे वापरता येतील हे पाहतात.
       भक्तांना त्या थोर पुरुषाचा अभिमान वाटतो तर अनुयायांना त्या थोर पुरुषाबद्दल आदर वाटतो.
        भक्तांना सर्वांनी आपल्या सारखेच भक्त व्हावे असे वाटते तर अनुयायांना, लोकांनी त्या थोर पुरुषाचे विचार समजून घ्यावेत असे वाटते.
       त्या थोर पुरुषावर कुणी टीका केली तर भक्त त्यांच्यावर तुटून पडतात तर अनुयायी त्या थोर पुरुषांच्या विचारातील त्रुटी समजून घेतात.           
       भक्तांच्या दृष्टीने तो थोर पुरुष त्यांचाच असतो तर अनुयायांच्या दृष्टीने तो थोर पुरुष सर्व समाजाचा असतो.
        भक्त हे भक्तीमध्ये आंधळे झालेले असतात तर अनुयायी हे अनुकरणाने डोळस झालेले असतात!
        *सगळे थोर पुरुष मानवतेच्या कल्याणाच्याच गोष्टी सांगतात म्हणून भक्तांची संख्या कमी होऊन अनुयायांची संख्या वाढेल तेव्हाच जगाचे कल्याण होईल!*